Leyndarmál Helenu

Sólrík saga um fjölskyldu- leyndarmál og ógleymanlegt sumar eftir Lucindu Riley, metsöluhöfund bókaflokksins um systurnar sjö.

Það eru liðin tuttugu og fjögur ár síðan Helena eyddi stór- kostlegu sumri á Kýpur, þar sem hún varð ástfangin í fyrsta skipti. Þegar guðfaðir hennar arfleiðir hana að húsinu Pandóru, sem eitt sinn var töfrandi en er nú í niðurníðslu, snýr hún aftur til að eyða sumrinu þar með fjölskyldu sinni. En Helena veit innst inni að fegurð hússins hylur vef leyndarmála sem hún hefur haldið frá William, eiginmanni sínum og Alex, syni sínum.

Þegar Helena hittir fyrir tilviljun aftur gamla kærastann hefst atburðarás sem gæti orðið til þess að fortíð hennar og nútíð lendi saman með óafturkræfum afleiðingum.

Valgerður Bjarnadóttir þýðir úr ensku.

Kaupa bók

Bækur eftir sama höfund

Opnist í neyð

Í lífinu mætum við flóknum áskorunum sem rugla okkur oft í ríminu. Fyrsta skrefið til að takast á við þær er að beina strax huganum í rétta átt. Við vitum samt ekki endilega hvernig best er að gera það og stundum er enginn nálægt til að aðstoða okkur. Þessi bók er því handa öllum: okkur sjálfum þegar við þurfum að velja réttu leiðina, vinum okkar sem búa langt í burtu, börnunum okkar þegar þau fljúga úr hreiðrinu og fjölskyldunni okkar þegar við vitum ekki hvernig er best að orða hlutina.

Klíníski sálfræðingurinn Dr. Julie Smith snýr aftur með handbók fulla verkfærum til að takast á við áskoranir er varða geðheilbrigði og líðan í andartakinu þegar álagið er sem mest og daglega lífið fer á hliðina. Metsöluhöfundurinn Dr. Julie kennir hér milljónum lesenda að finna leiðina í gegnum erfiðustu augnablik lífsins frekar en að vera að vinna sig í gegnum áföllin árum eða áratugum eftir að þau áttu sér stað. Hvað ef við getum lært að virkja tilfinningar okkar og vera til staðar svo við getum unnið úr hlutunum og brugðist við aðstæðum á heilbrigðan hátt?

Valgerður Ólafsdóttir, sálfræðingur þýddi úr ensku.

Kaupa bók

Huldukonan

Konurnar í Lohr fjölskyldunni skilja ekki að Sigvaldi þeirra, með alla sína augljósu mannkosti, hafi aldrei gengið út. Ennfremur fá þær ekki skilið þá fráleitu ákvörðun hans að gerast einsetumaður í eyðivík. Þær eru raunar hættar að hnýsast í hagi Sigvalda, því í hvert skipti verður augnaráð hans átakanlega tregafullt.

Dag einn birtist Sigvaldi á dyraþrepi móður sinnar með mánaðargamla stúlku í fanginu og neitar að svara því hver sé móðir barnsins. Konurnar í fjölskyldunni hefja sína eigin rannsókn á málinu og smám saman hrannast sönnunargögnin upp: saga Lohr ættarinnar, þjóðsögurnar í Dýrleifarvík, leyndardómur um týnt barn og móður sem hvarf, undarlegir draumar, óvenjuleg hegðun Sigvalda og dulmagn hamranna í hlíðinni.

Kaupa bók

Frumbyrjur

Það er aðfangadagur og hjónin á Kölduhömrum búa sig undir jólahaldið. Handan áramóta eiga þau von á sínu fyrsta barni og spennan í kviðnum smitar andrúmsloftið. Snjórinn hleðst upp og vegurinn út úr firðinum hefur ekki enn verið ruddur. Þegar kýrin á bænum tekur sótt hrökkva dyr upp á gátt sem ekki verður lokað.

Frumbyrjur er margbrotin og nístandi saga um hversdagsleg kraftaverk og ástir sem rata ekki svo auðveldlega í orð.

****„Vel skrifuð, metnaðarfull og þaulhugsuð.“– Morgunblaðið um Sporðdreka

„Stórkostleg bók.“ – Víðsjá um Sporðdreka

Kaupa bók

Bækur eftir sama höfund

Frumbyrjur

Vegur allrar veraldar – skálkasaga

Haustið 1479 kemur kona norður yfir Kjöl og teymir hest undir gömlum manni. Skáldið Sveinn döggskór Þórðarson er kominn í Reynistaðarklaustur til að deyja. Þó ekki fyrr en hann hefur skrásett sannleikann um atburðina í Rifi, þegar Englendingar drápu Björn Þorleifsson, hirðstjóra konungs á Íslandi. Vígið kveikti ófriðarbál innanlands og utan, og kona Björns, Ólöf ríka Loftsdóttir, hefndi bónda síns svo grimmilega að sögur hafa gengið um það allar götur síðan.

En hvað af því er satt og hvað er logið, og hverjum leyfist að segja söguna?

Löngu síðar, á tímum samfélagsmiðla og örbylgjupizza, reynir sagnfræðingurinn Eyjólfur Úlfsson að endurheimta akademískan orðstír sinn eftir að hafa óvart eyðilagt ómetanlegt fornrit. Þær hrakfarir leiða hann til Kaupmannahafnar, þar sem hann rekur sig eftir ólíkindalegri slóð handrita og miðaldaklæða í átt að sannleikanum um atburðina í Rifi.

Fimmtánda öldin er öldin sem týndist í Íslandssögunni, þegar þjóðin lenti skyndilega í hringiðu evrópskra stjórnmála og viðskiptahagsmuna. Hér stíga helstu persónur hennar ljóslifandi fram: riddarar og sjóræningjar, konungar, hirðstjórar og höfðingjar, en líka fólkið sem þjónaði þeim og reyndi að ávinna sér frelsi og frið á vægðarlausum upplausnartímum.

Vegur allrar veraldar – skálkasaga – er sjálfstætt framhald Hamingju þessa heims – riddarasögu, sem kom út 2022 og hlaut tilnefningu til Íslensku bókmenntaverðlaunanna.

Kaupa bók